گلولك نسيتك تعقل شلون!
وهذا الگالك كل عقله ناسيك؟!
ولك حته القصايد صارن وياك
أكتب عالعراق وتطلع عليك....
ردت أنساك حته بنومي أرتاح
وأغمض جفني ويمرن طواريك..
وتمر يم باب عيني وتحچي الدموع
وتمر يم باب جرحي وينخبص بيك...
وتخضر تايه بلون المحطات
ويتانيك القطار ومايتانيك..
واشوفك سيف ماتندل الجروح
وتكسر خاطري وبجروحي أدليك.....
أريدك كبل گاعي تخضر جفوف
وكبل غيض الملح تضحك مساحيك
وتخليني أعله بالك حته لو طيف
وآنه عله الجرح من يغفه اخليك....
أنهجم بيتك شگد شايل حضارات!!
حمورابي أنحنه بكبره عله رجليك...
حقه يدوخ بيك ويصفن وياك
سر بعيونك يدوخ اليحاچيك
وتسودن بيك راد يضمك شلون!!
ياقانون يادنيه التكفيك!!...
يضمك بالمسله تشوفك الناس
يطلعك للشمس ويرد يغطيك......
گبل عقّال كلهه الدنيه والناس
بس مريت بيهه تسودنت بيك...
واجتّك كلهه تركض حته الزغار
نار گلوبهم جابتهم عليك
نفط بخدودك وگلب الشعب نار
حقل مجنون وتشب شيطفيك.......
ونخلة برحي طولك والشعر ليل
كلما تغفه يهتز ويوعيك.....
هلال العيد فوگ الحاجب يصير
بس ترفع الگذله نعيد عليك....
وفرات ودجله بعيونك يصلون
حلاه وملوحه ربك كلشي منطيك...
على رصعات خدك ينچفي الماي
وعلى گرمة علي الوادم تتانيك
،،،،،،،،،،،،،،،،،،،،،،،،،،،،،،،،،،،،،،،،،،،،،،،،
أحاول ما أشوفك وأنسه كل الفات
بلكي گليـبي يزهگ شوكك ويِــملك
اگول لنفسي باچر لازم انمــُــر بيك
واچذبني واصدك ..وأدري ما مرلك
صديقك مو حبيبك صعب هذا الدور
مثلته وغصب عالدمعه اضحكلك
وأسمحلك تدوس جروحي من تضوج
ومن تضحك بعد شتسوي اسمحلك
اشوف اهلك جنت والخاطرك كل يوم
ولأن گلبي يحبك صرت احب اهلك
ماينفع اسف والعمريمشي بساع
واني وياك تهنه وكلمن بمسلك
مجنون اني ما ارهم اعيش وياك
ومن جسمي ولك لو ردت اذبحلك
اشربك ماي عيني وتاكل من الروح
واذا حزنان اخلي جروحي ترگصلك
ماحسيت ابد بحساسي ماحسيت
رغم بيدي اجيب احساس واخذلك
وانته الدمعه ماتذرفهه لجل الناس
وماتعرف عدوك ذاك من خلك
ضل بهذا حالك واني هم ابعيد
واحسن خل اعوفك وانت احسنلك
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
لا تطلع حبيبي هواي بالصيف
لأن من الشمس خافنك اتموع
تفر بالسنه مره الشمس عالناس
وعليك اتدور كل ايام الاسبوع
الك بستان عمري اشكال الوان
تگطع ما يعجبك كلشي مشروع
واجيت استغربت ما گاطع اي شي
ومنرديت اثاري النفس مگطوع
تموتني بجمالك لمن اتفوت
وتضل روحي تون وتصيح وتلوع
واگولن اشتريك ابيش ما جان
والگه بلا سعر لك اني مبيوع
بيدك تذب بيه النار وتزيد
وتشب بيه المواگد بين الضلوع
واجيت بأيدي احرگك واخذ الثار
وثاري بأيدي عالگ عشرالشموع
كلامي تسمعه كل الناس وتخاف
وما اذكر سمعت بيوم موضوع
بس انت عكس .. حجيي تخلي
وعله حجيك اگلك صارمسموع
العسل صافن عليك وصچم اشفاف
انه بأذني سمعته بصوت موجوع
گال لشفتك اخرب عالوياج
دحني اعله العسل موكاتله الجوع
الشي من ينمنع ترغب اله الناس
يعني اصل المنع بالرغبه مطبوع
بس انه رغبتك وانت مسموح
عجب رايد عليه تصيرممنوع
الك عندي گلب ما عاشگ انسان
ولا نزل ابد عد غيركدموع
اخذه وبي ضمان ايام وسنين
اذا گبلك عشگ يا الغالي مرجوع
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
بوسط كلبي كتبتك حتى ما أنساك.
ونقشت احروف اسمك جوه بعضامي.
وصرت بس أنت أشوفك يعني انته اوياي.
موجود ابيقضتي وحتى بحلامي.
عليك أعلن حرب لو مره عني أتغيب.
ومجرد بس أشوفك أعلن إسلامي.
وروحي تصير شمعه وسكته بيه أتذوب.
إذا فد يوم اجيت وصرت كدامي.
إلك يحلى الشعر لو بسمك اكتب بيت.
وتكتب غزل لجلك كامت أقلامي.
حبيتك عمر وايامه تنزف شوك.
تعال اشبيك ضمد جرح أيامي.
تعال الفركة رمظان وشوفتك ماي.
وإذا تبقى ابغيابك راح أظل ضامي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
علـــى لحــــن الدمــع نــــامت عيــــوني الليـــل
و علــــى صــــوت القهـــر فـــز الصبــح گلبــي
لا ظــــــالم بشـــــر لا قاهــــــر أحـّــــــد يــــوم
ليـــــــــش يصــــير هيــــچ ويـــاي يـــا ربــي
مخنــــــوگة الســـــوالف تطــــــلع من الـــــروح
مـا أدري إشعجـب ؟ و شصـار ؟ و شذنبــي ؟
يــــــلوموني لأن ربـّيــــــت حزنــــــي ويــــــاي
المفــــــارگ محــــــب متگلــّـــي شـــــــيربّي .؟
صـــح تعـّبــني كلــش .. صــح سهــرت ويـــاه
بـــــس والله أصيــــــل و مـــا نكــــر تعـــــــبي
انه اكتب شعر شاعر خلقني الله
والـماعنده ذوق يـروح مـن يـمي
اترجم ما اشاهد واحجي واقع حال
اعله هم ناس نوبه ومره عن همي
انـت شـبيك تـاخذهـن عليك ثـكـال
مـو يمـك تـرانـه شبيـك متـحـمـي
يـمـعـود دبـطـل كافي مـا مـليـت
هـسه اتورطت من كتـلك بـاسمي
انه اعلى الخشب من اكتب الابيات
وانـحتـهـن تـرافه وذوق مـن دمـي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
يا ملاك وبيك محتاره العقول
شلون بالله نجمع سفاح وملك
الحواجب قوس ورموشك سهام
صوبن كلمن كعد يتأملك
والخدود شموس حل بيهن غروب
جل من سواك هيج وجملك
وصف شعرك ليل حالك بالظلام
يتيه كلمن سار بدروبه وسلك
شلون ربك جمع شمسين وظلام
أفتردماغي بهل أمر ورد سألك
والشفايف لاهي جوري ولاهي نار
جون كلمن دنت نفسه وقبلك
بيش تطلبني يبوالوجه الجميل
وشلك عندي تسلب بروحي شلك
ولك ماعندي كلب يحمل عذاب
جوزمني وعوفني بحالي ولك
روح ماأبريك ذمه وبالحساب
راح نتحاسب وصيرن ندلك
لأن من كثرة جمالك أسمي راح
وصار بين الناس أسمي مخبلك
،،،،،،،،،،،،،،،،،،،،،،،،،،،،،،،،،،،،،،،،،،،،،،
للشاعر ايهاب المالكي 2013
ليش نبجي ؟ وليش خلينه الدمع ينزل رخيص ؟
وليش كل لحظة جرح نكتب شعر
وليش ذبينه الفرح والهم جبير
وليش رغم اخطائنه نحب نستمر
ليش مذبوح الوفه بلحظة خداع
وليش مات الشوك والحب يحتضر
وليش خلينه المشاعر بس كلام
وبالعتاب شفافنه شكد تعتذر
اه منك يازماني تغيريت
وجسر طبعك صاير وماتنكدر
المشه بصفك خذيته ومدري وين
والرفض يمشي انوله من كل كتر
والغدر ناسه رفعته عللجتاف
وصاحب الصاحب كضه سنينه عسر
اه يادنيه صدك مابيج امان
وفرق بين اليوم وايام وايام الزغر
جانت كلوب البشر تنصع بياض
هسه لون كلوبهم ماينحزر
ممكن بلحظة يجيك بكل هدوء
وممكن بلحظات يتحول نمر
وانه محتار ويروحي بهالزمان
ساعه اشد روحي مثل شد الحديد
وساعه الين الروح حد ماتنعصر
وساعه احس روحي على هدومي غريب
وخلص صبري ومابعد بيه صبر
وليش خلينه الدمع ينزل رخيص ؟
وليش كل لحظة جرح نكتب شعر
،،،،،،،،،،،،،،،،،،،،،،،،،،،،،،،،،،،،،،،،،،،،،،،
